عرب موتورز arabmotors موقع السيارات العربي الاول

السلام عليكم ورحمة الله ..

اقراءو هذة الرسالة من واحد اشترى عربية شيرى a11

تحية طيبة لكل اعضاء ورواد قسم البريليانس والشيرى ( مع انى مش عارف ليه هما فى قسم واحد )
المهم .. كنت فى سوق مدينة نصر يوم الجمعة اللى فاتت بدور على عربية فى حدود 45 الف جنيه .. بعد اللف طول النهار لغاية قبل المغرب بشوية مكنتش لقيت حاجة تشدنى ( انا ليا شروط معينة فى العربية وحالتها ) بعد ما قررت انى اروح من غير عربية لفتت نظرى عربية شيرى a11 لونج موديل 2006 وقفت اتفرجت عليها لقيتها بحالة الزيرو برة وجوة وكمالياتها كلها شغالة والعربية الصراحة زى الفل مفيهاش غلطة تقفيلها ممتاز والخامات الداخلية فى الصالون جيدة الى حد كبير ( العبد لله كان معايا اوبل فيكترا واسترا واكتر من نوبيرا ورينو سينيك ومونديو ولانوس وفيرنا وغيرهم كتير وعندى خبرة كبيييييييييييرة جدا ) المهم انى قررت اشترى العربية واجربها حتى من باب العلم بالشى وفعلا اشتريت العربية بسرعة ( انا مبخفش من اى عربية ). وانا مروح بالعربية متوقع مع نفسى كدة ان العربية دى ممكن تتفكك منى وانا ماشى او يحصلها حاجة غريبة كدة زى ما بنسمع اخبار وحواديت وقصص عن العربيات الصينى . بعد شوية بدات اثق فى العربية وبدات سرعتى تزيد 80,100,120,140 على الدائرى والعربية لسة كمان فيها سرعة وثابتة بشكل كويس جدا جدا .. قلت استنى لبكرة لما يظهرالعفريت بتاعها عشان طبعا اى عربية صينى لازم يكون فيها عفريت على حد علمى . بس الغريب بقة ان كل يوم بيزيد اعجابى بالعربية بجد مع تحفظى على شوية حاجات زى شكل التابلوه القديم جدا ونوعية تنجيد الكراسى .مفاتيح النور رديئة جدا بس شغالة كويس نور التابلوه شديد جدا وزاهى زيادة عن اللازم .. يعنى حاجات زى كدة لكن من ناحية الموتور والعفشة والفتيس والثبات والشكل العام العربية هايلة .
بس انا ليا سوال عن خبراء الشيرى . العربية دى ملهاش اى اثر على النت دورت فى كل المواقع العربية والاجنبية . الشيرى a11 معروفة وليها اسامى كتير فى اكتر من بلد لكن اللونج دى انا مش عارف لها اسم ولا لقيت لها صورة واحدة على اى موقع ( انا طبعا اقصد المواقع الاجنبية اللى ممكن تكون بتقيم العربية بشكل علمى ) يا ريت لو حد عارف ليها اسم تانى ابحث بيه يبقى ليه كل الشكر