|
الـحـل الـوحـيـد لـصـيـانـة رجّـة الـبـاتـرول و عـلـى الـضـمـان ( تـقـريـر مـصــوّر )
السلام عليكم .. الكثير من ملاّك الجيوب يشتكون من رجّة أثناء القيادة .. و خصوصاً الباترول .. الكثير من ملاّك الباترول قد أزعجته هذه المشكلة .. و قد يلجأ إلى الصناعيّة و لكن لا تختفي المشكلة أبداً .. يعني بالعربي .. تروح الصناعيّه و يقولون كلام واجد .. جلد مقصّات و تغيير ركب و وزن مدري إيش و شد رمّان و ذراع دركسون و مساعد دركسون .. و فيه ناس تسوّي تدبيل لمساعد الدركسون و هذي كلها تسوي لا تحل المشكلة من جذورها .. و تدبيل المساعد يخفف المشكلة بس .. نجي للزبدة .. الشاب الطموح عبدالرحمن اليوسف .. الذي يهوى صيانة السيارات منذ نعمومة أظفاره >> أصلاً ما أمداها تنعم من طلع و هو ماسك مفك 10 .. و الذي درس الميكانيكا إضافة إلى عشقه لها .. و الذي أبهر مدرس المعهد و هو في الأول متوسط في قسم الميكانيكا >> بقول السالفه بعدين اكتشف سبب مشكلة رجّة الباترول لأن سيّارته باترول .. فعزم على حلّ المشكلة .. فاستغرق دراسة هذا الموضوع مدة سنة تقريباً .. الظاهر ما فيه مسمار ما فكّه .. إلى أن وصل للحل و هو عيب مصنعي و استطاع إصلاحه من غير تبديل أو تغيير أي قطعه .. أنا أتكلّم عن رجّة الباترول اللي تضطّر سائق السيّارة إنه يخفف السرعه عشان تهدأ الرجه .. الرجة الشديدة في الدركسون و هو يروح يمين و يسار .. ـــــــــــــــــــــ و رأيت الكثير يشتكي من هذه المشكلة و رأيت كيف استطاع عبدالرحمن القضاء عليها .. و كيف دفع البعض مبالغ و لا تزال المشكلة قائمة .. فأردت أن أقدّم خدمة للطرفين .. و هي إرشاد الإخوة لحل المشكلة و إفادة أخي و صديقي عبدالرحمن .. عبدالرحمن يعمل حالياً في ورشته الخآصة .. استطاع أيضاً حل مشكلة رجة جيوب التويوتا و لكن اللي أخذت منه الوقت و الجهد هي الباترول .. لوحة الورشة .. عبدالرحمن ( أبو ناصر ) بجوار عامله الهندي على يساره .. عبدالرحمن و العامل في صيانة سيارة زبون .. صورة للورشة من البوّابة .. عبدالرحمن أيضاً متمكّن و بقوّة من ترهيم السيّارات و هذي ددسن مركب عليها مكينة سدرك .. مكينة سدرك راسين و كما هي موضحة بأصابع الأخ في الله .. و السيّارة تابعة لعبدالرحمن و تركها في الورشة فترة لعدم التفرّغ .. شرب الشاهي و عبدالرحمن يشتغل و كتابة بعض نقاط التقرير و إعداده .. و الآن أتوقع الجميع يسأل و يتساءل عن كيفيّة الوصول لورشة اليوسف .. ورشة اليوسف تقع في صناعيّة الموسى على طريق الحائر .. الوصف : و أنت على الدائري الجنوبي بإتجاه الغرب .. يجيك مخرج الحائر مخرج رقم ( 21 ) .. تمسك الخدمة و تاخذ يسار من تحت الكوبري بإتجاه الجنوب يعني كأنك رايح الحائر .. تمشي لين يجيك الكوبري خلك تحت لا تطلع فوق .. هذا تقاطع طريق النصر اللي يوديك للعزيزيّة .. خذ مع الإشارة يمين .. تمشي لييييين تجيك أول لفة يمين تلف معها .. ماريّة اللفة قبلها فيه برج جوّال و إذا وصلت اللفة فيه على يسارك محطّة بنزين .. خذ مع اللفة يمين .. بعدين تجيك مثل العكفه يعني شبيه بحرف التي .. يعني تاخذ يمين ثم يسار علطول .. تجيك الورشه على اليسار .. ثالث ورشة و لوحتها موجودة من ضمن الصور .. نبي نقدّم لكم خدمة VIP و نعطيكم إحداثيّة الموقع .. E 046 * 44 . 454 N 24 * 34 . 840 رقم الأخ عبدالرحمن بعد إذن الإدارة .. 0542340602 و تعرفون عمل الميكانيكي و انشغاله فأتمنى تقدير هذه المسأله و عدم الإتصال إلا في الضرورة .. عشان كذا وضّحت الوصف من أجل تخفيف الإتصالات عشان الوصف .. ــــــــــــــــــــ ملاحظة أخيرة .. والله الذي لا إله إلا هو أنني لست صاحب الورشة و لست من أقاربه و إنما من زملاءه المحبين له .. و ليس والله لي أي مردود مادي و يعلم الله أنني ما فعلت هذا إلا لخدمة الإخوان هنا و لخدمة الأخ عبدالرحمن .. و لأكون أكثر وضوح فأنا من طلب من الأخ عبدالرحمن هذا التقرير و لجهله التام بالأنترنت و المواقع رفض .. و بعد الإصرار و الإقناع وافق .. و قال سيكون لك نسبة إذا جاءوا عن طريقك و رفضت ذلك و قلت أنا مابي شي و يشهد الله .. حتى والله إنّي ما سألته عن السعر .. و أطلب من الأعضاء هنا بعد الذهاب و التجربة كتابة ما لديهم .. سواء ضبطت سياراتهم أو لا .. و الله أعلم .. و صلى الله على نبينا محمّد .. |
| الساعة الآن 06:27 AM |
Powered by vBulletin® Copyright ©2000 - 2024, Jelsoft Enterprises Ltd. By
Mohamed Mohtrf
عرب موتورز3.6.0 ©2011, Crawlability, Inc