السلام عليكم ورحمة الله وبركاته
حياكم الله جميعاً آل فورتشنر
مبارك عليكم الشهر .. بعد الزحمة
كل عام وأنتم بخير .. قبل الزحمة
أبارك للمشرفين الجدد :SnipeR (22): ******** ألا والله أنت القديم :D
ابراهيم.1 و أبو وليد
ولا يهون حبيبنا المشرف المتقاعد .. محمد بن عمر :SnipeR (87):
أما بعـد :
الموضوع سريع وخفيف وهو مقسم إلى خمسة أقسام
-----------------
أولها : إضافة لمبه صفراء للكبوت
صورة الفيوز والفاصل
#
اللمبة 55 واط
#
وهذا موضوع بالتفصيل عن تركيبها
طريقة تركيب لمبة الكبوت (صور x صور)
-----------------
الثاني : تمديد سلك للأيكوم من البطارية
العلبتين البيض هي فيوز للسلك
#
السلك داخل للغمارة من خلال الربله
#
نهاية السلك يطلع من عند فتحة الجلنط
-----------------
الثالث : تمديد سلك من البطارية مباشره لولاعة إضافية
وسبب هذا التمديد والولاعة الإضافية هو أن الولاعة الشد بلد إذا طلعت المفتاح من السويتش تفصل , يعني لازم يكون المفتاح في السويتش عشان تشتغل الولاعة
طبعاً أستخدمت سلك أيكوم أصلي مع الفيوز
السلك داخل للغمارة
#
السلك يطلع من تحت الدرج وتلاحظ الفيوز في العلب البيضاء
#
نهاية السلك فيه ولاعتين , وحده بسلك عريض والثانية بسلك صغير , وإذا ما أحتجت لها لفزتها في الديكور عشان ما تشوه المنظر
-----------------
الرابع : إضافة لمبة بيضاء 4 واط في باب الشنطة
اللمبة مثبته في الباب , بيني وبينكم أوجعني قلبي يوم خفست الباب بالدريل لأن هذا أول خفس أسويه في السيارة
#
هذا فاصل اللمبة , صغير وشحليله ودك تزرطه من صغره
#
اللمبة مشبوكه على سلك الولاعة الخلفيه الي جنب الباب , والعلبة السوداء هي الفيوز
وطبعاً نرجع لمشكلة أن اللمبة تطفا إذا طلعت المفتاح من السويتش , وراح أحل المشكله بأني أمد سلك اللمبة وأوصله مع سلك الولاعة الإضافيه الي في القسم الثالث
-----------------
القسم الخامس والأخير : ملاحظات بسيطه استفدتها من ناس شاركوني في هذا الشغل
1- أحرص أنك ما تقطع أي سلك شد بلد , وإذا كنت مظطر فأجرح سلك الشد بلد أوضف عليه الي تبي زي ما أنا سويت في لمبة باب الشنطة , عشان إذا شلت السلك الجديد يبقى السلك الأساسي زي ماهو
2- أستخدم الفيوز في أي سلك تبغى تضيفه , حفاظاً على كهرب السياره من الإلتماس
3- أستخدم الجرجور في الأماكن الحاره مثل الكبوت , من باب الإحتياط
4- أنا أستخدم العازل الحراري أو الي يسمونها المكرونه , الي تكمش مع الحراره وتمسك في السلك
5- في بداية السلك عند البطارية أستخدم هذي المشابك , أسهل لك إذا بغيت تشيل السلك من البطارية
تم الموضوع , شاركوني بملاحظاتكم وإقتراحاتكم
محبكمـ / أبو محمد
حرر في 11/9/1432 هـ
لاأبيح نقل الموضوع إلا مع ذكر المصدر
فارس العودهـ / منتديات تويوتا العربية