كيف حالكم جميعاً..اليوم عندي لكم موضوع(كيف تعبي كفر سيارتك المبنشر بالهواء وأنت مامعك لاماطور هواء ولا لــي هــواء..
يمكن الكثير مننا تعرض لموقف صعب في البر ولا حوله أحد أن بنشر عليه أحد الكفرات ومعه رقعة للكفر أو نسم الكفر ويحتاج للهواء.. ولكن لايوجد معه ماطور هواء أو لي هواء أو لمن نزل ماطور الهواء تفاجأ بأنه لايعمل..حدثت وتحدث كثيراٍ مثل ذالمواقف,.,!!
إخواني أنا تعرضت لمثل هذا الموقف..
بنشر علي كفر وركبت الإسبير.. وشوي بنشر الكفر الثاني والمشكلة كنت ناسي ماطور الهواء..وكانت توجد معي رقع للكفرات..ولكن وش الفايدة منها...وانا مامعي ماطور اولي هواء..


المهم إنتظرت ابي اشوف آدمي على الأقل لو شيء يتحرك ومضت الساعات وأنا أنتظر الســراب...
يقول المثل(من له حيلة فليحتال)وايضاً(الحاجة أم الإختراع)


شغلت راسي ونزلت عدتي وقعدت أضرب الأفكار(كيف وكيف وكيف).....
أنا عندي مصدر الدفع للهواء البواجي.. ولكن لو مديت لي مباشرة من البوجي للكفر ما أستفيد شيء..لأن البوجي الهواء اللي يدفعه يسترده مره ثانية..يعني يبيلي شيء يمنع البوجي من استرداد أنفاسه..دورت في عدتي شيء يسمح يدخول الهواء ولا يسمح بخروجه...وبعد عناء وتدوير في كل شيء,,
إكتشفت حاجتين..وحدة في العزبة بمعية إسطوانة الغاز..
والثانية في الكبوت بمعية باكم الفرامل...
اللي في إسطوانة الغاز هي(الساعة)كما يسمونها...
وإللي في الباكم الوصلة الصغيرة اللي يركب فيها لي هواء الباكم..طبعاً سيارتي جمس(جمي)ذاك الوقت....


قلت بستخدم ساعة الإسطوانة أخاف مع الحرارة أخرب وصلة الباكم وإلا وصلة الباكم أسهل من ساعة الإسطوانة..لكني بديت بالساعة لعدم أهميتها...


اليكم الشرح مع الصور...
إخواني تراها فكرة بسيطة جداً..ولكنها..إنقذتني بعد الله..
احفظوها ترى يمكن تحتاجونها في أحد الأيام...
تراها بتفزع لك لنقطعت في المهمهية وبتغنيك عن إنتظار السراب..اللي كم وكم من الشباب وجدوهم أموات بجنب سياراتهم ينتظرون سراب المهمهية...
*
*
شوفوا القطع يابسطها بسطاه..

*
*
ترتيبها يكون بهذا الشكل..
ساعة الغاز تسمح بمرور الهواء في إتجاه واحد ولا تسمح له يرجع عكسياً...

*
*
باقي بس الهوز اللي يركب في البوجي..ولاحظوا طريقة تثبيته وياليت لو يكون معك بوجي ماتبيه وتكسره وتحشر الهوز فيه أفضل..لكن طريقتي بدائية لكنها فعالة...
وهذا رأس الهوز اللي بيركب في البوجي...

*
*
هذا رأس الهوز عند البوجي وكذا تقدر تتحكم فيه وتثبته..
اخواني ترى الليات موجودة في السيارة واذا كانت الليات قصيرة فك الكفر ورفعه في الكبوت..تحرك لاتموت..

*
*

*
*
باقي مشكلة ابرة البلف افرض مامعك شيء يطلعها عشان الهواء يدخل..لاتخاف..محلولة قطعة خشبة اوشجرة بس تكون قاسية شوي عشان تنحشر داخل البلف وتبقى متبته الإبرة لين يمتلئ الكفر..ثم بأول سكروب شلها..

منقول




وصلى الله وبارك على خاتم النبين عليه افضل الصلاة واتم التسليم
وسبحان الله وبحمد عدد خلقه ورضى نفسه وزنة عرشه ومداد كلاماته

الموضوع الأصلي: *^&إصنع ماطـــور هـــواء لسيارتك..ومن عــزبتك..بتعــرف..تفضل*** || الكاتب: تويـوتا || المصدر: عرب موتورز

المصدر: عرب موتورز arabmotors موقع السيارات العربي الاول