حصري كم مره ركبت كمبرسور ؟ وكل مره يخرب معك ولا تدري وش السبب ؟ خـذ تجربتي ،

[تويـوتا]

- السلام عليكم ورحمه الله وبركآته -

شخبآركم يا عيآل .. :SnipeR (66):


مشكله هالمكيف للكمورات مشكله .. إذا مو الكل عانا منها .. نقول 80% عالنو منهآ ،

بعطيكم زبده الموضوع ،


اول ما خذيت الكموره قعد معي المكيف تماااام حوالي 9 شهور .. وبدت المشاكل ،
اول مشكله كان فتحات الهوا حقت الراكب بارده ، والسواق مهي ذاك الزود ،

طبعاً هالمشكله ما اظن احد قد صارت له ،

وحلينا هالمشكله بالفريون ، وراحت ، طلع المكيف توب التوب ،



بعد فتره صار الكمبريسور يلعب بالمكينه لعب مهو صاحي ، يوم اشغل المكيف تجي رجه تهز السياره هز بشكل محد ممكن يتخيله .. يقعد شوي بعدين يروح ، قلت مو مشكله كل الكوامري كذا ،

فجأه صار يفصل المكيف
مثلا تكون واقف عند الأشاره وتبريده ميه ميه ، لامني مشيت .. تحس الهوا يطلع له ريحه مدري شلون قايله ، اقرب ما لها للعفونه ، ويفصل يجي هوا حار ، اضغط على مفتاح الأي [ اطفيه واشغله ] يرجع يشتغل وميه ميه ،

وبدت هالمشكله تزود حبه حبه ، اول كنت اسوي هالطريقه يمكن مره ويضبط الكمبريسور ، شوي شوي بدت تزود .. صرت اسويها طول ماني جالس بالسياره ، ما غير اطفي واشغل اطفي اشغل ،

اخر شي فصل ولا عاد يشتغل خير شر ،

رحت عند محل معروف بالصناعيه القديمة .. وواثق بشغلهم .. يقلي الكمبريسور خرب ولازم تغيره .. ولا منك غيرت الكمبريسور لازم تغير الرديتر ،

قلت مب مشكله ، غيرنا الكمبريسور بواحد مستعمل نظييف ، والرديتر بواحد جديد


قعد معي شهر و بدت نفس المشكله الي صارتلي ، يفصل من حاله ولازم تطفي الأي سي وتشغله علشان يشتغل ،
وبعدها بكم يوم خرب ولا عاد يشتغل ،



قلت يا رجال ورا ما تولف كمبريسور 2002 كلن يمدحه

وفعلا ولفت كمبريسور 2002
تبريده ماشاء الله تبارك الله ، تقل ثلاجه الي ينقلون فيها الخضروات

وفعلا ما تهنيت فيه .. كلها شهر ونفس النظام


رحت للرجال قلت له كذا وكذا صارلي ، قال الرجال عندك مشكله بالثلاجه ، او بالمواصير الي من الكمبريسور للثلاجه

قلت له والحل يا زكرت ؟
قال تنظيف المواسير والثلاجه ونجرب ، قلت له خليها بعدين .. قال ترا بيخرب الكمبريسور عليك مره ثانيه

قلت لا إنشاء الله ما يخرب ،

وفعلا ضرب الكمبريسور ولا عاد يشتغل

وجا وقتها روحه للأمارات .. قلت دامني رايح ورايح .. خلني اشوف نظآمهم شلون ،

شريت كمبريسور جديد من وكاله تويوتا هناك [ الفطيم ]
بـ 1900 ريال .. عندنا 3700 ، غش على مستوآ
هناك مكتوب عليه صنع في اليابان ، وهنا صنع في استراليا

الزبده شريت رديتر اصلي معه وحطيه بالشنطه وجيت


يوم جيت هنآ .. واحد من العيال يسولف معي ، يقولي اعرف واحد فلبيني يشتغل عند عبد اللطيف .. بس يشتغل بورشه ثانيه دوام مسائي ، ورا ما توديها عليه وتجرب ،

وديتها بنفس اليوم ، وقالي نفس كلام خوينا هذاك .. انو المواسير فيها وصاخه [ الله يكرمكم ]

قال باخذ شغل ايدي 400 ريال ، واتحمل كل شي ما عدى الكمبريسور والرديتر ، يعني لو طلع خراب بأي شي غير الكمبريسور والرديتر انا اغيره لك قلت حلو .. عندي كمبريسور جديد وعندي رديتر جديد ،

يعني شغل الرجال كله تنظيف بـ تنظيف
ويركب الكمبريسور والرديتر


قالي خلص ما عندك مشكله ،
وبدا يشتغل ، وعينكم تشوف الوصاخه الي طلعت ،

ترآب ومويه ،
على موية خضرا مدري وش تبي ،
على برآده حديد وانواع الروايح والخناز
وانواع الحشرات والصراصير [ الله يكرمكم ]

مدري وش دخل الحشرات والصراصير بالمواسير حقت الكمبريسور ؟؟؟ :tinysmile_cry_t2:
كل هذا بكوم ، والرديتر بكوم ، الرديتر الجديد الي تونآ مركبينه ،، الرجال يأس منه من كثر الوصاخه الي فيه .. ينظف ينظف ينظف وينفخ بالمويه والأسيد .. والوصاخه ما تخلص ، قلت خلاص اتركه عندي واحد جديد

الرجال صرآحه اشتغل من قلب

الحين اشوف المكيف احسن من قبل بكثير ،
فعلا بآرد واختلف السما عند الأرض ،
بس إنشاء الله ما تصير مشاكل لآني تعبت نفسياً :SnipeR (33):
وتلاحظون اخر فتره .. لا مواضيع ولا ردود لآني منشغل فيه


بس الحمدلله كل شي زآن بفضل الله ،


أسف عالأطاله بس وربي محروق قلبي ومبسوط بنفس الوقت ،

حطيت تجرتي هنآ يمكن احد يستفيد منهاآ ..

اي اسئله آنآ حآإظر .. :SnipeR (87):