عرض خاص شركة تظليل و أفلام حماية

[هوندا]

بسم الله الرحمن الرحيم


::: السلام عليكم و رحمة الله و بركاته :::


في البداية , خلوني أوضح لكم إني ما لي أي علاقة لا من قريب و لا من بعيد بهالشركة

لكن يعلم الله إن الموضوع هذا كله, لحسن تعاملهم أولاً و جودة شغلهم ثانياً

طبعاً أخوكم شرى هوندا أكورد و أستلمتها بعد العيد ب 6 ايام

و كنت أفكر مثل أي واحد يشتري سيارة جديدة بالتظليل و أفلام الحماية و الأمور هذي

طبعاً كان تفكيري متمركز حول الشركات الكبيرة ( Drive7 , Zibart , M3 ) و غيرها

لكن لفت نظري محل ( لقربه من بيتي ) , اسم الشركة هذي Driver Dream

طبعاً دخلت عليهم و كان الموظف أخ سوداني , و قلت له معاي أكورد و أبغى تظليل

قال بـ 1900 ريال , طبعاً سعرهم كويس مقارنة بغيرهم , و مع إني ما أدري بينهم إتفاق

مع شركة هوندا لكن الرجال بنفسه قالي : عندنا خصم خاص لـ هوندا !

و راح أحسبها لك بـ 1200 ريال !! , بصراحة سعر خرافي جداً مع وجود ضمان من الشركة

لمدة 10 سنوات على التظليله , طبعا شغلهم إحترافي بحت رحت لهم اليوم ( الخميس ) الساعة 9 الصباح و كان تقريباً 4 إلى 5 عمال يشتغلون على السيارة كل واحد ماسك جهة

بصراحة حسيت فعلاً بشعور و إنطباع جيد على المحل

الشئ الثاني كنت مفكر أركب فلم حماية على الأنوار الأمامية ضد الغبار سألت عنه و قالي نركبه لك بـ 300 ريال , طبعاً سعر كويس و نلبس لك الدعاسات مجاناً , طبعاً الدعاسات كانت في الشنطة زي ما استلمتها من الوكالة ما فكيتها

غير كذا ركبوا لي وسايد على المراتب و شنطة في باب الراكب كلها مجانية

يعني صراحة شغل رهيب جدا و مجهود يشكرون عليه و تعامل أكثر من محترم

طبعاً المحل عنده تنجيد و شغل كبير صدقوني زيارته ما راح تضركم

و أعيد و أكرر و أشهد الله إني ما كتبت لكم هذا إلى تقديراً لتعاملهم الطيب أولاً

و السبب الثاني أتمنى الفائدة تعم للجميع و ما تقتصر علي


مكان المحل :


مدينة الرياض و أنت جاي من الدائري الشمالي ( مخرج 6 ) وجهك شمال تآخذ معه يمين

و تخليك في الخدمة رآح تجيك بندة على يدك اليمين , روح على طول بعد تقريباً 500 متر

راح يجيك المحل على يدك اليمين اسمه Driver Dream لوحة المحل سودا