مشكلة بنزين 80 مع تويوتا و بارس

[عاشق الصمت]

السلام عليكم ورحمه الله
لي صديق دكتور صيدلي بيشتغل مندوب ادوية او حاجة كدة السلك ضاربه شوية ومعاه تويوتا ياريس 2006 من الزيرو
العربية حالتها ممتازة وعاملة اكتر من 160 الف كم لان مشاويره كتير والرقم ده قليل على مواتير تويوتا
المهم لقيته من اسبوع بيقولي تعالي جرب عربيتي
بقوله ليه يا احمد مانا عارفها
المهم صمم وقالي تعالي بس
جربت العربية وانا معرفش غرضه وكنت فاكره عايزني اتمنهالة او الاحظ مشاكل فيها
طلعت بالعربية اول وتاني مع الحرق على الغيار
ركزت مع العفشة والموتور كلها كويس
المهم قولته خلص عايز ايه
قاللي العربية ماشية ببنزين 80
انا ضربت فرامل مرة واحدة وتنحت
وبعد كدة قرصت مرة واحدة على العربية قامت مسقفة
قاللي لاء سوق زي ما طلعت اول مرة
احرق عالغيار ماتسقفش
انا بقيت مش مصدقه
قاللي والله 80 من ابو 90 قرش
انا بمشي 300 كم في اليوم واتخرب بيتي بنزين
موتور الياريس نفس موتور عربيتى الكرولا 2007
وانا قبل كدة اتزنقت وحطيت بنزين 90 و 10 لتر بس العربية سقفت وكركرت وحسيت انها بتشتمني
العربية معدل الانضغاط بتاع الموتور 10 او 10.2 مش فاكر قوي
وانا عارف اني طالما اكتر من 10 يبقي ماينفعش اقل من 90 ابدا
بيقولي انا معملتش اي حاجة في الموتور وكل فترة بيحط منظف دورة الوقود وكدة
مش عارف اقوله ايه انا جربت العربية بنفسي
وادائها معقول مش واو
عشان انا عربيتي مركبلها فلتر k&n سبور بكيت كامل بس ده يدوب بيحسن تنفس العربية بس
انا عارف ان موتور العربية vvti
ممكن يكون ده سبب انها تتقبل النوعية دي
مهندس امر الكوافي مدير خدمة عملاء بروتون كان بيقولي انهم بيجليهم مواتير الصبابات والبساتم سايحة من استخدام بنزين 80

حد ليه تجربة مع بنزين 80 في مواتير بنسبة انضغاط مشابهة؟؟