ماااااااااااااااااااائة بيت في الجــيـــب نفداه


اكبر علي اللي مايقدّر بالاثمان=مايعرفه ياكون من فعتباره

للحرب حرّابه وللخيل ميدان=وللعز كسّابه ولليل غاره

والعرش فوق الموتر اللي لما بان=مثل القمر الى اكتمل في مداره

يشعل قلوب اهل المحبه بنيران=ويعمي عيون أهل الضغاين بناره

ماجابه التصدير .. يكرم كحيلان=ماكتب له عن المرور أستماره

راحت ثلاث سنين مذنب وغلطان=ومن طاح من ذنبه يذوق المراره

حلمت به وفزعت ذاير وحيران=هالتني وصوفه وقوّ أقتداره

قمت ارتعد واشرب ولاني بضميان=وأجف واعرق واطلب الأستجاره

وامسيت من ماريت خايف وسهران=أخفي دموعي لاتبيّن الاماره

لكن سرّ ولاجدى فيه كتمان=شهرين والمبلي يزيد أنحداره

حالي برى واصبحت طايح وهلكان=غايب وعي والوجه بيّن صفاره

بكوا هلي واضحوا على همّ واحزان=وعجزوا الأطبّا وكملت الاستشاره

واقفت سنه وانا طريحٍ ووجعان=اون واشكي مثل راعي الجباره

نزحت في كلّ العواصم والاوطان=ولاحد جنا ممّا بذر له ثماره

الين جينا شيخ في هضبة عمان=في معرفة الأمراش ذاع اشتهاره

ساعة دخلت ورتّل آيات قرآن=فزّيت مثل اللي عدل فازوراره

قام يتنشّدني وانا ابيّن الشان=قال أستكنوا وابشروا بالبشاره

اللي بلاه انّه من العشق هيمان=والعشق كم شاجع يشقق زراره

واندب مراسيله الى سيّد الجان=جاب النبا مع كباره صغاره

قال انه مصنّع بلا قيد وعنان=لحاكم بروناي على غراره

أسرف بماله دون منّه وحسبان=يبا يحقق مايحقّ افتخاره

جمّع اساطير العرب وادها الالمان=وتجارب اليابان لجل أبتكاره

تكاتفوا وافنوا قبل صنعه أزمان=وتعاهدوا والوعد برج التجاره

قاموا عليه بحسن تخطيط واتقان=حتّى انجزوه بكل فنّ ومهاره

يوم انتهوا ولابقى فيه نقصان=عدّى العيوب ولو تدّور دواره

قلنا ولك مليون تكفا على شان=مليون في مليون ماهوب خساره

اندب لكسبه خيرة انجال شومان=حاظوا عليه وخطّطوا بانفجاره

وارتاعت امريكا وعاشت بنكران=ظلّت وماتوا فيه أعضا الاداره

كلٍ يحسب انه غدى أشلاء شتّان=ولادروا باللي خذه بالظفاره

وجينا عليه لديرة العزّ نجران=تباشرت به كنّها فنتظاره

تخابروا بالعلم حضرٍ وبدوان=والفوا يشوفون الخبر وانتشاره

أربع ليالي أتحفى بصيوان=من جا يبارك سطويته واحتكاره

خذ بعدها عامين ماراح زعلان=مني ولا ارضى ضيقته وانحساره

مااغفى ولا اسهى عنه من حيث ماكان=قلبي يفكّر فيه ليله نهاره

افزّ واسري من حلا النوم ولهان=انادمه وارقد بوسط الغماره

حراام لولا النوم والنوم سلطان=مافقتني به ظروف وخساره

كيف انقصر دونه وحن كن حن اخوان=أضيق لامن ضاق وآخذ بثاره

الجيب عندي مايكايل بميزان=له في سويدا القلب باني عماره

يجذبك يامن خايله جذب الامزان=أفضل نموذج يحتفظ للحضاره

فيه أتغزّل وانتشي باشجى الألحان=عشقه ينومس ماهو بعشق ساره

لاجيت اوصف بديه بسيد الالوان=امووت واحيا فيه تاره وتاره

خط الموديل اللي مع الجنب فتّان=خطوه أهل الأخدود قبل اندثاره

بالريش والتشكيل ناقشه فنّان=يغلب مع الظلما غظاها حماره

تشبه مراياته ثنادي بجنحان=وتشبه تيوتا من على الجنب شاره

معلّقه بزرار في صدر قبطان=يفخر بها لانها وسام الصداره

تظاهي انواره من الوجه تيجان=تبلج من الليل الغلس لك أناره

من بينها التمثال يشدي لعنوان=فوق الخطاب ومرسلته السفاره

وجنوط لو لان الزبر منه مالان=في جنبها فتحات مثل السواره

توايره تمشي تحت أمره قيان=وان داست البيدا تسابق خضاره

أسج واسهى عن دركسونه احيان=وينزل عى الرمله وأعدّل مساره

لارد تسمع الأرض تدعيه بأحسان=كنها تقول( الله لنا ياسماره )

عليه فزّة قرم في يوم الاكوان=وله كرّه وفرّه وحسن أستداره

يعطيك وجهه مقبل أقبال راكان=ويعطيك ظهره مايريد أحتقاره

تشوفه ان دبّر يراعيك خجلان=اقفايته مجفال طفل الحجاره

مشيه على الأرض العتش مشي سكران=ومشيه مع اللّفات في وسط حاره

خفّة مرادونا وتمويه زيدان=ومشيه الي صادفك راعي زقااره

وكنّه بتحديد الهدف روي سولفان=وكنّه رزان المغربي بالنظاره

اسرح وافكّر في عجايبه سبحان=من ألهمه ملك الجمال بجداره

فيه أجتمع سحر النصارى وشتّان=المعجزه والأحجيه والأثاره

والظاهره وأقوى الأدله وبرهان=والمزريه والمخزيه والجساره

ولي فتحت الباب يلقاك ريحان=يزكيك كنّك في محلّ العطاره

تصيبك الرهبه ويدخلك بهتان= تقول : كنّك داخلٍ لك وزاره

تجلس على سيتٍ عن الضد منصان=فوقه تحس انك عليت المناره

مصنوع من جلد الهياثم وكتّان=منسوج والديباج فيه بغزاره

لونه الى شبّهت باللون سيّان=هو والحليب اليا حلب في غظاره

يظيح طبلونه ويظهر لك بلان=والقير كنّه تحت يمناك فاره

وشاشات ترسم مايوارا للاعيان=تحدّد ابعاد المسافه .. وطاره

مذّهبه باغلا سبايلك ومرجان=من خلفها بيدا امبير الحراره

صلفٍ ومفتاحه كما لسان ثعبان=يرسل بسلفه للكتاوت شراره

كن حس سلفه دندنه لابن دوغان=لاجرّ صوته دوّروا فالزباره

ولاشتغل صوته عوى الذيب سرحان=واليا اقتفيته صيحة في مغاره

مكينته فيها ثمانين شيطان=ماتستمع للآدمي في قراره

مخلوقه امن النار ماهيب انسان=لاشك ربّي ذلّها بانتصاره

لادست بنصه وانعمس راح غضبان=يسري كما اللي ناويٍ بانتحاره

يقحص وتصريخه على سمع الآذان=صيحة بكر في حلّ فك البكاره

ماينرد مسراه لاسار بركان=لو بلّغوا (عين اللّوي) ( للقراره )

مامدى المعمّم فيه يرسل بالأعلان=الى وهو قد زلّ وابعد دياره

يبدي على ماقول مافيه خذلان=وياقف تواظع منه عند الأشاره

لاوقّفت جنبه كرلاّ ونيسان=يغضَ طرفه كنّها بنت جاره

زرقه عن عيون العرب زرق حبّان=وخوفه غريرٍ مانجح فاختباره

وقعه قليل الخير لاشاف ديّان=وغنجه على وصف الكويتي ..( عياره )

أغنى ملوك الأرض لو كان من كان=ماتاتي امواله بقطعة غياره

لو خيّروني به وخاتم سليمان= أخترت ماصليت فيه أستخاره

كل امنياتي ليت لو ان له لسان=أقدّمه وقت الحظا للكباره

ان رحت من فوقه وفرّعت طربان=واسمعت صوت الحارثي في عياره

كنّي ملكن الكون سطوه وبلدان=واخذت به عند الحبايب زياره

ولله فلا أحسد ابن دغمل وبقشان= هذا التجاره والتجاره شطاره

من كثر مااداريه واخشاه ينهان=من عذربه عندي يظيّع وقاره

بيدي اصونه لانه حصان ويصان=أغسله وانوي عليه الطهاره

وفي كلّ شهر افدي بكبش من الظان=نذرٍ عسى الدنيا نذر لانكساره

آجيه باريني على شوفه ادمان=أحب وقفاته واحب ادخاره

وآحب مافيّاه من ذيك الأغصان=وحتى الزفلت اللي يدوسه وقاره

أراقبه من كل حاسد وعدوان=وادراه وامسك عند بابه خفاره

هذا وهو لليوم ماجزته للالحان=ياليت مادلّ الحكا باختصاره

ماكان جمّلني معه غير ديوان=أخط به عجز الشعر واعتذاره

لاشك قالوا زبدة الهرج نيشان=ولاحدٍ تجي دنياه حسب اختياره






شومان : أوّل من خلق من الجان

روي سولفان : افضل لاعب بلياردوو

بلان : خطّه

عين اللّوي , القراره : مراكز تفتيش في جنوب المملكه

م
ن
ق
و
ل