السلام عليكم ورحمته الله وبركاته
في ليلة البارحة ذهبت الى منطقة سيلين بامسيعيد التي تقع جنوب قطر
وكنت ماشي عالسيف (الشاطئ) وكانت المايه ساقيه والهوى شرقي
وكان الدفع عالوضعية الطبيعية Auto ومشغل نظام sand ومنسم هواء التاير 17-18 درجة
وبعدها في طريقي وقبل وصولي الى العنه بكيلو تقريباً
الا اشوف قدامي السيف مقطوع ومسافة مياة البحر تقريباً 50-70 متر
قلت في خاطري ماغامر دام عندي مجال اني ارجع واحاول اني اتفادى القطوع واطلع من ورى الطعوس
لحد ماوصل العنه , المهم يوم ريوست والبحر صار في ظهري وابي اكسر الا الموتر غرز في محله
والدنيا ظلمه وانا على اعصابي ففصلت مانع الانزلاق وشغل السنقل وماطلع وانا على ريس خفيف
وبعدها شغلت وضعية 4L وبنفس المنوال لين مانزلت من الموتر واشوف دواسات الموتر
لاصقه في الرمله وبعدها حفرت شوي ونسمت التواير ل15 درجه وركبت الموتر وبنفس المنوال
الموتر موراضي يطلع وبعدها شغلت الدف لوك وقلت هذا آخر مجال وانا على اعصابي والمايه
قاعده تسقي رويداً رويداً فاتصلت على احد الأخوه في العنه وقتله لحق علي تراني مغرز
وفي المكان الفلاني قالي
المكان الي غرزت فيه يسمونه مقبره سيارات قتله وشو !!!!!
قالي خلاص الحين جايك وبعدها تذكرت الفيديو
طريقة خروج البـاترول من التغريزه اذا تذكرونها
ولكن موقف اخوكم قـاهر الدروب كان اسوأ منه فقلت بحاول اني افر السكان يمين ويسار
وعلى ريس خفيف وفعلاً حسيت السكان بدى يخف من اليمين للشمال وعلى ريس خفيف
يعني على ضغط 1 او 1.5 وبعدها وبدقائق معدوده طلع الموتر بمعجزه من مكانه ^_^
واول ماطلعت الا اشوف الموتر الي جاني اتصلت فيه قتله يافلان مفاجأه الموتر طلع بمعجزه
قالي الحمدالله وبعدها دلاني عالطريق لحد ماتفاديت القطوع ولحقته لين ماوصلنا العنه
ولكني اندهشت من
طريقة خروج الموتر وفعلاً تيقنت ان النيسان البـاترول
الجديد
يستحق بلقب بطل الدروب وبكل ثقه ^_^
ولولا الدف لوك كان ماصار الا الي صار
وانا اشكر جزيل الشكر اخونا صاحب الفيديو وفعلاً المقطع فادني
وراح يفيد كل ملاك البـاترول
الجديد اذا طبقها بنفس العملية
ولكم كل التقدير...