إمبارح... جيت أدور العربية... مش عايزة تدور... و ديه من أوائل تجاربي في أعطال المواتير الديزل....
البطارية كويسة و بتقوم المارش...(بس للأسف نامت من كتر محاولات الدوارة)
موتور المارش شغال كويس (باين من صوته)
السخانات.. شغالة (بسمع صوت التكة بتاعتها)
الطرمبة... (بقفلة بلادها) على كلام المالك القديم... و عمر ما حد جه جمبها...!!!
الموضوع بأه محير أكتر كدا....
الكهربائية و الميكانيكية اللي حواليا في المنطقة.. محدش فيهم بيشتغل في الديزل...
عملت موضوع أسأل على ميكانيكي ديزل كويس.... الردود كانت (صفر) 
المهم... في النهاية و بمحض الصدفة جبت رقم ميكانيكي ديزل (شغال في العربيات النص نقل) و طلبت انه يجيلي... و الحقيقة كان متعاون جدا و جه و جاب معاه كل اللازم.... (بطارية و كابل و طقم عدة)
المهم... راجع على الكهربا اللي واصلة للسخانات... لقاها واصلها كهربا كلها...
فك الخرطوم اللي خارج من فلتر الجاز و رايح عالموتور... و كارك على الزر اللي فوق فلتر الجاز... لقاه مش بيطلع أي حاجة....
شفط الجاز ببقه لحد ما طلع جاز....
بعدين ركب الخرطوم تاني و دارت العربية... و رجعنا على ورشته تاني.. و هناك... غيرلي ال4 أفايز اللي رابطين الخرطومين (الداخل و الخارج) عشان العربية ماتاخدش هوا تاني...
و اتحلت المشكلة...
أنا حبيت أشارك معاكو التجربة... رغم أني عارف أن نسبة الناس اللي معاهم عربية ديزل في المنتدى لا تتعدى ال 5 % بس لمجرد الإفادة... و أي حد يحب يسأل عن حاجة بخصوص مواتير الديزل... أنا تحت أمره
la;gm td hg],hvm >>> , hjpgj hgpl] ggi