السلام عليكم ورحمة الله وبركاته
باختصار شديد يا أخواني بدون مقدمات
أخوكم حيران بين سيارتين
ألتيما 2011 (4 سلندر) فل كامل ( خليجي)
حصلتها ب 75 ألف ( بدون ضمان) من أحد المعارض ( أوراق جمرك)
الصراحة الموتر دخل مخي غصب علي
ما قدرت أطلعه من راسي أبد
أضريت أستأجر ألتيما 2010 ستاندر تماتيك 4 سلندر
وطلعت عليه من الرياض للقصيم
والجو ويشهد علي ربي كان عجاج وهوا وتربات وووووو .......الخ
لكن ما شاء الله وربي ما حسيت فيه
ما شاء الله رساوة ودعس على كيف كيفك
رحت للوكالة وسألت عنها
ألتيما 2011 (4 سلند) 90 ألف
فل كامل
الصراحة انصدمت من سعرها علشان كذا فكرت بالسيارة الثانية وهي متقارب لسعرها وهي هوندا كورد 2012
لكن بعد ما سمعت أن يوجد ألتيما خليجية بنفس المواصفات ب 75 ألف بس بدون ضمان عادت لي الرغبة من جديد لها.
لكن المشكلة انصدمت أكثر من موضوع القير في الألتيما لما نبهني له مدير الصيانة ونصحني ب 6 سلندر ( لكن قالي المشكلة تقريباً محلوله مع 4 سلندر ) لكن تبيلها ترهيم وما ترهيم وإلى آخره. و 6 سلند غير متوفر في الوكالة أضف لذلك سعره العالي المقارب لسعر الماكسيما.
لا أخفيكم رغبتي بالألتيما ( داخله مخي غصب) مواصفاتها خلتني ما استوعب ( تشغيل ذكي و cd و فتحة وجناح و شكلها الرياضي) لكن الصراحة أخوكم نيته يشتري موتر ويستعمل أقل شيء 5 سنوات
ولا ودي أبتلش بموتر يخربط علي حساباتي الجاية.
أخوكم توه متزوج وعملي بالرياض ونا من سكان القصيم لازم تقريباً بالشهر 3 مرات اتردد للدوام 300 كلم رايح 300 كلم جاي
الحمد لله أنا من النوع المحافظ وما ني راعي خرابيط والسرعة حدودي تقريباً 160 إن انهبلت وغلبت الروم وصلت ل 180.
فيا أخواني وش تشاوروني عليه وأنا أخوكم
ألتيما 2011 خليجي أو هوندا كورد 2012
وما يحتاج أوصيكم طبعاً
بدون تعصب للمواتر
فأنا أستشيركم وما خاب من استشار
وأنتم أهل للاستشارة والثقة إن شاء الله
واعتذر عن الإطالة.
(سؤال شاطح شوي : هل أستطيع أجبر الحمراني على ادخال السيارة تحت الضمان؟ )
Ho,;l td pdvm >>>> shu],kd