أول اختبار لثبات العربية.. (Audi A4 1.6 1998)

أول اختبار لثبات العربية.. (Audi A4 1.6 1998)

السلام عليكم..
كيفكم يا سباب.. يا رب يكون الجميع بخير..

الليلة دي من شوية يعني و انا نازل مشوار.. كنت ماشي علي الدائري بين طريق السويس و طريق الاسماعيليه.. و في المنطقة دي كان في عربيات نقل كتير ماشية علي اليمين.. (طبعا كنتمستغرب جدا الوضع ده.. لكن قولت الحمد لله..) عشان عادة بيمسكوا الشمال و اللي عايز يعدي يخبط راسه في الحاجز الاسمنتي اللي في نص الطريق..

لقيت قدامي زحمة كده غريبة.. مش طبيعية يعني.. و بعد شوية وقت و مشي بطييييييء لحد ما اتضح ان الزحمة دي سببها ناس مختلة الإدراك و مش قادر اقول عليهم اقل من كده.. عشان لو قلت حاجة تانية هاشتم.. و مش شتيمة بسيطة.. هاتلفظ بابشع الألفاظ و الشتايم..
زفة.. ماشيين علي الشمال و بالراااااحة.. و اكتر من عربية كمان.. و قافلين الطريق.. و مش بيعدوا حد.. و علي اليمين في عربيات نقل ماشية..و الواحد يضرب كلاكسات و يقلب نور و هما ولا هنا.. فاكرين الواحد بيهيص معاهم.. و بيوجب كده..
المهم فضلت لازق ايدي علي الكلاكس لمده لا تقل عن دقيقة كاملة.. و منور النور العالي.. لحد ما اتفتحت ثغرة قدامي خرجت منها.. و كنت خلاص وصلت لأول الزفة و عربية العروسين.. (ربنا يسامهحم بقي و يجعل الدعاء اللي الناس دعيته عليهم من نصيبهم..)

المهم انا كنت في الحارة اللي في النص الشمال.. مش اقصي الشمال.. و هووووب.. اخدت حتة غرزة من قدام عربية العروسين دي.. (وكانت الانترا الجديدة و كانوا حاطين عليها نور كلها زي بتاع رمضان اللي الناس بتحطه في البلكونات كده..)

و كنت قاصد بصراحة اني اخد الغرزة دي فجأة من قدامهم.. وبس كنت ماشي بسرعة اعلي منهم يعني.. عشان اخض اللي سايق بس.. و حصل و اخدت الغرزة.. و طلعت منهم و اذا بيا و انا باعدي بصيت علي العداد.. لقيت اني ماشي علي 140..
انا بصراحة اتخضيت.. و استغربتني بشدة.. اني اعمل حاجة زي كده.. بس يمكن العربية الحمد لله مكانتش محسساني اني باجري قوي كده.. و مطمناني..

الخلاصة.. العربية ما شاء الله ثباتها جامد جدا في الملفات و الغرز.. بس برضه الحق يقال ان الكاوتش و الجنوط اللي فيها مقاس كبير شوية.. عشان الناس تبقي شايفة الصورة كاملة..

الجنوط 17 و الكاوتش 215-50 r17

العربية مقاساتها الاصلية 185-70 r15
195-60 r16 و ال2 يركبوا عادي.. و ممكن كمان ال16 يبقي 205 عرض..مفيش مشكلة.. و اعتقد برضه لو العربيةكانت بالجنوط العادية بتاعتها كان الثبات هيكون اقل من كده حاجة بسيطة. و برضه كنت عامل نفس الحركة من غير ما اكون حاسس بقلق..

الدروس المستفادة:

لو لقيت زفة في اي حتة مش شرط علي الدائري بس.. ابعد عنها تماما.. و حتي لو نصيبك خلاك وراهم.. حاول متتعصبش ولا تضايق نفسك..

و اهم من كده.. بلاش الغرز اللي هي بتكون بسرعات عالية.. و متكونش واخد بالك من سرعتك و انت بتعمل كده

الموضوع الأصلي: أول اختبار لثبات العربية.. (Audi A4 1.6 1998) || الكاتب: عين شمس || المصدر: عرب موتورز

www.arabmotors.mosw3a.com

كلمات البحث

موتورز، سيارات امريكية، سيارات اسيوية

المصدر: عرب موتورز arabmotors موقع السيارات العربي الاول

---

H,g hojfhv gefhj hguvfdm>> (Audi A4 1>6 1998)

يسلموووووووووووووووووووووووووووو

بارك الله فيك يسلموو