السلام عليكم ورحمة الله وبركاته
إخواني أنا واحد اعتبروني منكم وفيكم ، واعتبروا إلي بقولكم اياه نصيحة من اخوكم فتقبلوا كلامي الله يخليكم ، أنا واحد مظلوم وانظلمت ومابيكم تنظلمون نفسي ، وراح اقولكم سالفتي مع الجيب اليديد ( الترف ) مع الوكالة.
أنا يا جماعة شريت باترول 2011 قبل 9 شهر se الفئة العليا ، مامداني اتهنا فيه وإلا ونزل موديل 2012 بمواصفات أحلى ( رنجات 20 + جلد ) ، رحت حق المدير السيرلانكي في الوكالة ورمست وياه كم رمسة ، وقلت له ابي اركب الرنجات الكبيرة قالي فالك طيب ركب بس احتمال تصير فيه مشاكل بسيطة ، قلت له مثل شنو ياريال ، قالي مثل رجفية واحتمال تعور جيرك ، المهم قالي إن كل هذي أمور بسيطة وأنه راح يساعدني عليها ، المهم يا اخوان الريال الله يعطيه العافية دلاني على مدير المبيعات وخصم لي سعر 4 رنجات ب 11 الف درهم ، المهم بعد استعمال 6 اشهر قمت اسمع اصوات من الجير ولاحظت إن التباديل ماهيب سليمة ، اتصلت على السيرلانكي وخبرته بالموضوع قالي رنجاتك القديمة موجودة ولا لا ؟ ، قلت له موجودة طال عمرك ، قالي ركبهم وييبهم الوكالة ، المهم سوا فحص وطلعت المصايب بالجيب ، الجيب طلعت فيه مشاكل بالجير ( بحاجه إلى تبديل) والدفرنش أمامي وخلفي ( الخلفي تالف والأمامي يحتاج صيانة ) وفيه مشاكل كثيرة طلعت الله لا يبلاكم ويحفظكم ، المهم الريال سوا تقرير وصور السيارة وراسل مركز الضمان الرئيسي للنيسان ، ويا الرد إن كل هذي المشاكل بالجيب كثيرة وماهي معقولة ومكلفة على الشركة وما تطلع مرة وحدة إلا إذا كان راعي السيارة لاعب بمواصفات الوكالة ، وكلفت الوكالة تقني فلسطيني يسمونه بو مازن ، فحص الجيب يدامي ، وركب وصله من الكمبيوتر إلى كلبس تحت السكان ، وطلع بالكمبيوتر رسايل خطأ المخزونة في ذاكرة الموتر إن الجيب عدد لفات دوران الإطارات أقل مما هو مبرمج عليه وإن السرعة كانت زايدة أكثر مما اهو مبرمج عليه ، وإن خلال فترة كانت السيارة زايدة حمولة الرنجات 5 كيلو ، فعرف هذا الفلسطيني الشاطر إني مركب رنجات 20 بدل من ال18 ، المهم استعلم بالشركة وطلع فاتورة الرنجات الي شاريها من 6 اشهر مع فاتورة التركيب ، المهم قررت الوكالة اسقاط الكفالة نهائيا عن الجير و ملحقاته والحين أنا اتحمل تكاليف التصليح والتبديل فوق 50 الف درهم غير شغل اليد وغير سعر الرنجات الي شريتها ، حسبي الله عليك يا بو مازن ، حسبي الله عليكم يا وكالة ، حسبي الله عليك يالسيرلانكي يالي نصحتني ، وعلى فكرة نفس السالفة تكررت مع وايد ناس في جميع أنحاء دولة الإمارات
والله نصيحة لاخواني النياسين وربعنا بأنكم لا تلعبون بمواتركم ترى حملة اسقاط الكفالات ماشية بقوة وبحدة السيف ولاتطيعون كلام البياعين والي يشتغلون بالوكالة ترا همهم استغلال الزبون وانهم يفيدون ربعهم ، واذا صار وماصار قالوا الأوامر والكفالات من الشركة الأم واحنا مانقدر نسوي شي ولا عندنا واسطة إن نتحكم بالموضوع ، ويحطونكم أمام الأمر الواقع ، أنا حاليا أفكر ابيع موتري بالسكراب وآخذ لي موتر صالون لي ولأهلي وعسى الله يفرج همي ويعوضني بغيره ، ولا حول ولا قوة إلا بالله.
وأي استفسار اخواني فالكم طيب
04-23-2012, 07:11 AM
المواضيع المتشابهه
العرض العادي
