من كثر خوفي على سيارتي وكأغلب حال أي واحد مشتري سياره جديده ، كنت أداوم على الصيانه لكن مثل ما كلكم عارفين أسعار مرتفعه وبعضها بدون أي حق ، لكن كله عشان هالضمان ،،
المهم من هالمنطلق دورت في المنتديات الأجنبيه عن الضمان عندهم وهكذا لكن ما طلعت بنتيجه لإن أغلبهم ملتزمين فيه لإن صيانة الوكاله عندهم أرخص من بعض المحلات ،،
بعدها مريت ع كذا وكاله ، في سفرتي من المدينة المنورة للشرقية ، وطلعت بكلام واحد ونتيجه وحده ،،
وإلي هي ...
إذا صار أي مشكله في سيارتك ( مشكله بسيطه غير متضمنه المكينه أو القير أو الأشياء إلي تحتاج صيانه ) ، راح يسونها لك بدون أي نقاش سواء منتظم في الصيانه أو غير منتظم ..
أما إذا واجهتك مشكله شوي صعبه كمشكله في المكينه أو في القير ، يرفعون طلب بالتصليح لإدارتهم ، وتجي الموافقه أو الرفض على حسب ألتزامك بالصيانه ، وأحيانا يوافقون موافقه مبدئيه ويفكون الجزء إلي في المشكله ويشوفون إذا المشكله سوء أستخدام أو مشكله مصنعيه ، بس أنهم راح يستقعدون لك شوي لو ما كنت منتظم في الصيانه
الحل الأمثل إلي لقيته ، أنك تغير الزيت وأي شئ تبيه برا كفحامات فلتر إلخ ، لكن تجيهم كل 10 آلاف وتسوي صيانه لكن بدون تغير أي شئ لا زيت ولا غيره ، هم راح يعطونك ورقه فيها إلي يحتاج ينغير ، وتكون التكلفه حول 200 إلى 300 ما تتعداها ..
لكن أنها تنسجل عندهم في النظام كأنك مسوي الصيانه ومغير الزيت وكل شئ عندهم ،،
وبالنسبه لي هذا كان أفضل حل ، وزياده أنك تتطمن ع السياره والمبلغ ماهو ذاك الزود على 10 آلاف كيلو ، بدل ما كانت 600 على 5 آلاف كيلو ، والأهم في الموضوع لو يصير في السياره أي مشكله مالهم أي أحقيه بإنهم يعترضون على أي شئ ووضعك جدا سليم وما فيه مناقشه ،،
وبالنسبه لي مشيت على هالوضع من فتره ،،
الزيت أغيره كل 10 آلاف كيلو ( موبيل ون ) والصيانه كل 10 آلاف كيلو ،
والفرق بين التغيرتين 5 آلاف ( أقصد مثلن لو أغير الزيت وأنا ماشي 25 ألف ، يكون الصيانه في الوكاله ع 30 ألف ، وتغير الزيت 35 والصيانه على 40 ألف إلخ ) ...
و في حال كان فيه قطع تحتاج تبديل أخذت السياره برا وشفت أحد يشوف القطعه إذا تحتاج تبديل أو لا ، إذا تحتاج بدلتها عنده بملغ بسيط جدا ،، (( أحيانا الوكاله تقول لك غير القطعه الفلانيه ، ولكن باقي من العمر فيها النص أو أكثر ، ))
05-13-2012, 02:15 AM
المواضيع المتشابهه
العرض العادي
