سلام عليكم ورحمة الله وبركاته
نخش دغري بالسالفه,
نوع السياره: اكورد 2007 وشاريها شبه جديده
الكيلو ومستوى المحافظه على السياره: 164,000 ,ومحافظ على الموتر اكثر من صحتي يمكن:eek: (اغير الزيت بالعاده عند الوكاله واخر مره طبعا كان عند الوكاله من شهر تقريبا)
اشيك بعد كل اسبوع تقريبا على مستوى موية الاديتر واسحب العيار لاشوف الزيت:cool: (اخر مره كان قبل امس وكان كل شي اوكيه).
تجيكم عاد السالفه اللي ما بغت تجي:d
امس الصباح الي هو يوم الاثنين معتاد اروح لمزرعتنا وراء المزاحميه وكان مشوار معتاد, وانا نازل من (القديه) وبعد ما استوى الخط وانا كنت امشي تقريبا 180 (وهالسرعه معتاده موب شي جديد على الموتر) طلع صوت واحد من اليمين متاكد طاخ طيخ هههه الصوت مره وحده ( انا للامانه قلت يمكن كفر من الكفرات توني مركبها طقم:( بس فكيت رجلي من البنس الين وصلت تقريبا السرعه 100 بعدها صوت طاخ بس مره وحده واخف من الاول) سحبت فرامل لين وقف الموتر, ويوم وقف الا وزيته يخرخر! طبعا زيت الماكينه وانكب تقريبا منه 70 الى 75 في الميه منه يوم وقفت الموتر والباقي اكيد من حصل الطاخ طيخ الين ما وقف الموتر!
وديتها لعميل لاخوي ومسوي ميكانيكي وهي فوق السطحه قال الدعوه فيها خبر موب زين يمقن :( ونزلنا الموتر من السطحه وقال دق سلف .. قلت الموتر ما فيه زيت قال دق ثانيه بس ودقيت سلف وصوت الله يجيركم قوي, قال الموتر لازم مكينه حتى التوظيب ما ينفع لها!!
الموتر منطول عنده لاني قلت بشوف , ولا نيب متاكد وقال كم واحد من الشباب لازم تاخذ الموتر مهندس ثاني بس شغله الموتر ما يمشي, وكلمني البارح وقال اسعار المكاين من 8000 الى 9000 ريال سعر الماكينه الموظبه من 4500 الى 5000 ريال
انا اولا لست متاكد ان الموتر مخبط لانو اول مره تحصل معي حاجه زي كذا وزيت الوكاله مع السيفون يمشون فيها 5000 كيلو والموتر ما كمل 3000 كيلو وكان زيته اشقر قبل امس!
ثانيا/ لو جدلا ان الموتر مخبط هل التخبيطه كامله او نص وهل المفروض اوظب اذا يمديني او مكينه من التشليح؟؟
ثالثا/ هل تعرفون ميكانيكي صاحي فاهم في صناعية الخليج او اي صناعيه اخرى بالرياض بس اهم شي تنصحون بشغله ( لان موتري ولله الحمد وقفاته عند الورش فقط عند عميل لي فلبيني وبس للفحمات) والزيت كما اسلفت بالوكاله!
اسف جدا على الاطاله بس قرات كم موضوع هنا واشوف الاعضاء تسال الشخص كذا مره قلت خلني اجيب لكم السالفه بالتفصيل علشان اخلص واتوكل على الله واودي موتري المنطول من ظهر امس الى احد صاحب خبره ويقول لي السبب اهم شي بعد ( لان صاحبنا يوم سالته قال حديد وش تقول له ) رد خلاني اعيد حساباتي واخلي السياره عنده على ذمة التحقيق.
الف شكر وتحيه والله يوفق من يساعدني او يدلني على احد يساعدني
ودمتم بكل ود
02-07-2012, 06:49 AM
المواضيع المتشابهه
العرض الشجري
