استفسار عن بعض النقاط بعد شهر من الاستعمال ..

استفسار عن بعض النقاط بعد شهر من الاستعمال ..

صار لي قريب الشهر الآن مع النيسان باترول الجديد ..

والصراحة موتر ولا أروع من حيث الثبات والرساوة ..
القيادة فيه ممتعة لابعد درجة .. والحمد لله إنني اخترت النيسان ..

هناك بعض النقاط أو الاستفسار عنها

(1) الدبل ..
لازم أوقف السيارة علشان أشغل الدبل الصغير ؟
الدبل الكبير طبعا متعودين إنه لازم نوقف ونشغله ..
لكن الدبل الصغير الوكالة قالوا لي لازم توقف .. ونحن متعودين نشغله والموتر يمشي وعادي ..
لكن ماعندي فكرة بالنسبة للنيسان الجديد .. لذا ارجو من الذين جربوا افادتنا ولكم جزيل الشكر ..

(2) مثبت السرعة ..
لما اثبت السرعة يشتغل الردار اللي يخلي الموتر يخفف من سرعته لما تكون سيارة جدامك ..
لكن الصراحة احس إنها مزعجة لأن تخفيف السرعة مبالغ فيه .. السيارة اللي جدامك بعيدة وايد
حتى مع التحكم وتبديل مستوى البعد .. التأثير ليس بالكبير .. لدرجة أن من يومين كنت مشغل
المثبت وماشي وكان في موتر خلفي .. وفجأة علشان السيارة اللي جدامي قربت شوي ولا نيساني
صاك بريك موطبيعي !! انا كنت مسرع تقريباً 110 وواضح اللي جدامي كان ماشي 80 تقريباً ..
لكن اللي صار ان اللي وراي صك بريك حسيت إنه كان بيدعمني !!

يعني خاصية الردار مفيدة لكن اذا كنت مسافر ..
داخل البلد مالي حاجة لأني سايق ومتحكم في السواقة وماني محتاج مثبت السرعة إلا لمدة محدودة ..
علشان أمشي في حدود السرعة المسموحة بدون ما أسهى عن عداد السرعة وشوي ولا أنا طايف الـ 120 !!
ويصيدني الرادر بعدين .. وماني ناقص نقاط !!
ودايما استعمل المثبت على الخط السريع من دوار الجوازات إلى دوار التضامن فقط .. طبعا ادري عن اماكن
الردار الثابت .. لكن المتنقل مو كل مرة تنتبه له ..

أدري طولت في الموضوع .. لكن هل في طريقة لإغلاق الرادر (( بدون إلغائه نهائياً )) ؟؟

(3) الاصطابات الخلفية ..
طبعا اقصد اصطابات الضباب الصغيرة اللي في أسفل الصدام بالخلف .. شلون أقدر أشغلها ؟

(4) السماعات الداخلية ..
اسمع صوت خرخشة في سماعات النيسان لما اسمع مسجل أو قناة في الراديو ..
وما أدري هل هو عيب في كل النياسين .. أم المشكلة في نيساني ؟؟
علشان أكلم الوكالة عنها .. مع ملاحظة أنني ما شليت قراطيس الوكالة إلى الآن ..

حالياً هذا اللي يحضرني .. معليش طولت عليكم .. ومشكورين مقدماً لكل واحد يدلي بدلوه ..

وبالتوفيق للجميع ..

الموضوع الأصلي: استفسار عن بعض النقاط بعد شهر من الاستعمال .. || الكاتب: نيسان 1 || المصدر: عرب موتورز

www.arabmotors.mosw3a.com

كلمات البحث

موتورز، سيارات امريكية، سيارات اسيوية

المصدر: عرب موتورز arabmotors موقع السيارات العربي الاول

---

hsjtshv uk fuq hgkrh' fu] aiv lk hghsjulhg >>