كان اخر تعاملي معهم((عبداللطيف جميل)) قبل 7 سنوات حينما تركتهم واخذت سيارة كوماندر من جيب وكالة دوج المتحده وبعد ماشفت العنا من السياره ووكيلها والقطع اللي تجلس بالشهر والشهرين بعت الموتر الامريكي وخذيتلي في اكس ار وطبعا فرق الثرى والثريا وعقب ماخلصت 1000 كيلو جيت ابي اصلحله تشييك في وكالته اللي في طريق الملك سعود واول مادخلت عينت القهوه والقدوع .
والشاهي على قولة الشاعر
ياماحلا في الفلا فنجال بريه=جلابها جابها من سوق خولاني
ماتقلط الا مع تمر الحساويه=قنادها هيل والمعمال رسلاني
وعقب ماتقهويت واللي علي بالخير كان الوقت ثمان الاربع صباحا زهمو على رقمي الساعه ثمان وعشر ورحت للمهندس وقلتله ليش ماعندكم دفتر ضمان قال انت عهدك عهد الكهف الحين الامور كلها كمبيوتر قلت المهم تشييك ال1000المفروض مايطول متى اتخلصونه قال المهندس بعد ساعه قمت اكذب عيوني واصدقها.قال المهندس عندك اي ملاحظات قلت الهندبريك مرتخي شوي قال ولايهمك قلت طيب ويش يضمن لي انكم خلال ساعه انهيتو امور التشييك قال عندك ذيك الشاشه عاين في موترك قدام عينك لين ايخلص وعقبها عيني على الشاشه ولامرت ساعه الا وكحيلان خارجا من الصيانه.
بصراحه اعجبني اهتمامهم بالعميل وسرعة الأنجاز ولا أقول الا أكرمتونا الله يكرمكم بالدله المهيله ولابقى الا العوده ((كسر العود واللي يسمونه البدو العود الأزرق)) وأثنيت على تعاملهم الطيب واهتمامهم بالعميل ..
10-02-2011, 01:40 PM
العرض العادي
