ملحوظة هذه القصة تهدف لتعريف الأعضاء بكماليات السيارة a516
صحيت الصبح فى يوم زى أى يوم تانى و بسرعة نطيت على السلالم أصلى كنت متأخر شوية نطيت على الرصيف و انا ماسك الريموت من بعيد و فتحت المسوجر .. خفت شوية أصلى إفتكرت عربيتى القديمة إللى كانت ساعات مترضاش تدور عالصبح لكن الفكرة دى اتبددت تماما لما دخلت المفتاح فى الكونتاكت و الموتور لقط من أول مرة و صوته كان جميل و ممتع لكن قطعه صوت زمارة خفيفة اربع مرات و لمبة حمراء منورة فى التابلوة !! إيه الحكاية ؟؟ أه نسيت أربط الحزام ..... مكنتش محتاج أسخن كتير يدوب دقيقة كده على السريع استغلتها فى زبط السى دى و بعدين زبطت المرايات الجانبية يمين و شمال و انا فى مكانى من غير أى تعب من الزرار إلى فى مسند الباب إللى حنبى و كمان شغلت التكييف ظبطت المروحة و كمان درجة الحرارة إللى أنا عايزها و خليته يشتغل أتوماتيك و طبعا كل ده باللمس.
طلعت بالعربية لقيت صوت صفارة تانى قلت إيه خير ؟؟ طلع الباب إللى جنبى مش مقفول كويس و طبعا عرفت بسهولة لإن الكمبيوتر عرض جرافيك بيان فيه مكان الباب المفتوح .
بصيت بسرعة على الساعة إللى فى التابلوة لكن فجأة لقيت لمبة صفراء منورة أتريها لمبة البنزين مؤشر البنزين دخل على الجزء الأحمر الأخير قلت فرصة أعدى على البنزينة بسرعة.... مكنتش محتاج أنزل أفتح باب التانك فتحتة و انا فى مكانى بمنتهى السهولة .
بعد التموين طلعت على الطريق و العربية ماشية أخر حلاوة أول ما وصلت لسرعة أربعين الأبواب سوجرت لواحدها لزيادة الأمان .
و انا ماشى و كان الطريق نصة مترب شوية فجأة طلعلى كلب حيران الحمد لله مسكت فرامل على الأخر و قدرت اتفادى الكلب و انا دايس فرامل و من غير ما العربية تزحف من الرمل بسبب نظام ABS نظام EBD .
كملت الطريق و الجو كان جميل جوة العربية طبعا بسبب التكييف و سلاسة القيادة و ثبات العربية الجميل و طول الوقت كمبيوتر العربية كان بيديلى متوسط إستهلاك البنزين .
المهم وصلت بالسلامة و نزلت بسرعة علشان ألحق جهاز الحضور و الإنصراف و بعد ما سجلت نفسى افتكرت إنى ما قفلتش العربية و بسرعة بالريموت قفلت العربية و اشتغل جهاز الإنذار .
و انا فى الشغل إفتكرت إن كان فيه ملف فى شنطة العربية نسيت أخده معايا كلفت عم عبده يجيبهولى هو نزل و انا فتحتله الشنطة بالريموت و انا واقف فى الشباك .
بعد الشغل قولت أعدى على أخويا فى المحل بتاعة و كنت ماشى و فاتح الزجاج كنت ناوى اسلم و امشى على طول لكنه طلب منى اقعد معاه شوية لغاية ما يجهز لى حاجه هاخدها معايا فدخلنا المحل بس قبل ما أدخل قفلت الزجاج و العربية كلها بالريموت كنترول .
المهم اخويا إدانى حاجه أوصلها لواحد صاحبه و حطها فى شنطة العربية و لما ركبت و طلعت بالعربية الصفارة صفرت و الكمبيوتر قالى بالرسومات إن الشنطة مفتوحة قفلتها و طلعت بالعربية و لما وصلت لصاحب أخويا حاولت أفتح الشنطة قبل ما أقف بالعربية من الزرار إللى فى التابلوة لكن طبعا ممنوع فتح الشنطة و العربية ماشية المهم لما وقفت فتحت شنطة العربية و انا قاعد جواها و صاحبى أخد حاجته و قفل الشنطة كويس .
المهم كان الليل جه نورت نور التابلوه لقيته ضعيف عاليتة لغاية ما بقى واضح و كمان عدلت إرتفاع الدريكسيون أصلى مكنتش مرتاح له .
لما نزلت المدام و الولاد المدام حبت تطمن على شكلها فإستعملت المراية إللى فى الشماسة إللى نورت و نورت كمان نور الصالون اللى ناحيتها علشان تشوف كويس ، و انا قبل ما اطلع قفلت السنتر بتاع الأبواب كلها علشان الأمان و كمان لغيت امكانية فتح و غلق الزجاج الخلفى علشان اللعب و التكييف و الأمان كمان ، و إحنا ماشيين دخلنا شارع ضلمة قولت انور نور الشبورة يوضحلى معالم الطريق لكن مش هى دى وظيفته ده نور المفروض يستخدم فى الشبورة فقمت مشغل النور الواطى لقيتة ضارب لتحت شوية فرفعته بالزرار إللى فى التابلوه .
و بعد ما وصلنا نزلنا من العربية و نسيت النور بتاعها منور و مفتكرتش الحكاية دى إلا بعد عشر دقايق رجعت اشوف النور و ألحقة قبل ما يقضى على البطارية لقيت العربية فصلت النور لواحدها بعد دقيقتين المهم أنا دخلت العربية و قفلته برضه من ذراع النور.
بعد أما خلصنا مشوارنا كنت راكن فى حته ضلمة و كنت تقريبا مش عارف العربية فين قمت مستخدم الإنذار علشان أعرف مكان العربية إللى أول ما حست بيا نورت الصالون علشان أدخل أنا و الأولاد بكل سهولة و أمان و لما دخلنا و على ما ظبط الولاد و الشنط و خلافة كان نور الصالون ابتدى يطفى شوية شوية و بدل ما أنورة تانى علشان اشوف الكونتاكت فين لقيت الكونتاكت نفسة منور علشان يدلنى على مكانه كمان ذراع النور بتاع التابلوه كان منور نور أخضر خفيف علشان اشوفه بسهولة.
رجعت بيتى أخر الليل أنا و ولادى و إحنا مستريحين و مبسوطين و ركنتها تحت البيت و انا بقول الحمد لله رب العالمين أللهم ما دومها على نعمة (الوزة) و أحفظها من الزوال
11-16-2009, 11:08 PM
المواضيع المتشابهه
العرض العادي
