إخواني حصل لي موقف مع شركة توتوتا فرع ينبع البحر رحت للشركة أسوي
صيانة 5000 كم وأعطيتهم بعض الملاحظات منها صوت في الدركسون وأيضا مشكلة يدخل الهواء من جلدة زجاج باب السواق في الركن العلوي الأيسر المهم ياشباب إستقبلني موظف الإستقبال مهندس من دولة السودان الشقيقة وكان حسن الإستقبال لي , عالعموم شرحت له كل اللي عندي وطلع معاي مهندس وشغلت السيارة علشان يتأكد من صوت الهواء وبعد ما ركب لاحظ المشكلة وأعطاني فاتورة قيمتها 131 ريال قال لغيار الزيت والسيفون رحت للصندوق وسددتها وبعدين رجعت له وقلت متى أستلم السيارة قال يوم الخميس قلت ليش ؟ قال : لازم تأتي الموافقة على سيارتك وأنها على الضمان من الفرع الرئيسي علشان نصلح جلدة الزجاج قلت : موافق وسألني المهندس هل معاك سيارة بديلة قلت : لا . سكت المهندس وغير الموضوع وقال أعطيني مفتاح السيارة وتعال في الموعد ( هذا الكلام صار يوم الإثنين ) علما لست من أهل ينبع وإنما فترة عمل وأرجع لجدة . عالعموم خرجت من الشركة ورحت شركة بدجت لتأجير السيارات وطلبت سيارة حتى يوم الخميس وقلت للموظف سيارتي في شركة توتوتا قال لي موظف بدجت غريبة ليش ما أعطوك سيارة بديلة دائما شركة تويوتا تحول عملائها علينا وتأجر لهم سيارات على حساب الشركة . المهم إتصلت على المهندس وشرحت له موضوع السيارة البديلة قال لا نستطيع إعطائك سيارة حتى تأتي الموافقة من الشركة إن السيارة على الضمان علما أن السيارة كامري 2012 وماشية 4950 كم يعنى أكيد على الضمان . المهم ما حبيت أنتظر لإنه كنت مستأذن من العمل علشان أصلح السيارة عالعموم إستأجرت سيارة حتى يوم الخميس .
ويوم الأربعاء وأنا خارج من الدوام مريت شركة توتوتا علشان أشوف وش صار بالسيارة . قابلني أخونا المهندس/ السوداني وقال : والله ماصلحنا السيارة قلت ليش قال والله ماجت الموافقة على تصليح سيارتك الشركة ماردت علينا كل يوم نصور السيارة من كل جانب ولكن ما ردو علينا عالعموم قال المهندس خذ سيارتك الآن سوينا لها صيانة 5000 كم ومتى ماجت الموافقة نتصل عليك وتجيب السيارة قلت : طيب المهم طلع لي السيارة ولاحظت إن بوية السيارة كاملة فيها زي نقط الزفت وقلت للمهندس إش هذا أنا جبتها لكم نظيفة وتعطونيها وبويتها معدومة وفيها نقط زفت وإحتمال ما تطلع من البودي ضحك السوداني وقال : وديها التلميع الساطع وتطلع من السيارة وقال لي حاسب عنها وجيب الفاتورة ونسددها لك من الصندوق .
أول شئ قلت ماني مسؤول عن غلطكم هذا ليش مو إنتوا تودوها التلميع الساطع وتنظفوها لي قال المهندس إنت وديها عالعموم أخذتها وراح أوديها يوم الخميس للتلميع الساطع ونشوف هل تطلع هذه النقط السوداء على بودي السيارة أو لا .
معليش يا أخوان طولت عليكم خلاصة الموضوع .
- المفروض يأمنوا سيارة بديلة لي ولا يستغلون المواطن السعودي خصوصا أكثر عملاء تويوتا فرع ينبع البحر من شركات ينبع الصناعية وأكثرهم أجانب ويأمنوا لهم سيارات بدون ما يطلبون .
- المفروض يصلحوا السيارة في موعدها .
- المفروض يحافظوا على سيارات العملاء بحيث عدموا لي البودي بالزفت والله حرام .
-ليش يماطلون العملاء بالموافقة على التصليح وخصوصا السيارة جديدة 2012 مالها شهر ليش يعقدون الموضوع .
حبيت أشرح لكم اللي صار معاي في شركة تويوتا.وش رأيكم في اللي صار ؟ وش تنصحوني فيه ؟
02-26-2012, 07:50 PM
المواضيع المتشابهه
العرض العادي
