السلام عليكم ورحمة الله
اخواني انا قدر الله علي وصارلي حادث شنيع على سيارتي اكورد 2012 والحمد لله على كل حال
صدمني شخص من جنسيه عربيه والغلط عليه مئة بالمئة وقدر المرور عليه ذلك .. وللاسف هو ماهو مأمن والسيارة باسم اخوه بعد ورخصته منتهيه بعد
ضربني من الجنب وهو مسرع داخل من حارة (فرعي) وانا بالرئيسي وماكنت مسرع... لكن من سرعته طارت سيارتي بعد ما ارتطمت بالرصيف وفرت بالهواء كم لفه بهلوانيه الى ان سقطت بين نخلتين .. والحمد لله على سلامتي
الزبدة سيارتي تدمرت تقريبا
جاء المرور وحجز الاخ الي صدمني
وشحنت السيارة للوكاله
وقالولي التسعيرة تطلع بعد اسبوع .. وقالي الموظف حقهم السوداني بالرياض انه يتوقع تكلفتها فوق خمسين الف ريال .. بسبب تلف العجلات والدفرنس الخلفيه والشنطه والباب الخلفي الايمين والقير صار يصب زيت مدري منكسر ولا منفقعه القربه
عاد اول مره من شريت السياره من اربع اشهر اول مره ما اربط حزام الامان سبحان الله.. بس الحمد لله
بس فعلا حماني بعد الله الايرباقات الجانبيه طلعت كلها وحسيت بفايدتها
انا مصور السيارة بحاول اجيب صورتها من جوالي واعرضها لكم
لكن بليز يا اخواني احتاج نصايحكم ومشوراتكم
اش اسوي ؟ واش نصايحكم من خبراتكم السابقه
علما باني لست مأمن تامين شامل لاني اشتريت السيارة اقساط عن طريق البنك الاهلي وليس تاجير منتهي بالتمليك .. وهذي غلطه والله
الان ابضطر اصلح السيارة على حساب الشخص الاجنبي وراح اقعد اطالب وراه ويماطل ومشوار طويل .. عسى الله يعين بس
والوكاله قالتلي ان مدة اصلاح السيارة لن تقل عن ثلاثين يوم
اشكركم جميعا ولا تبخلون علي بردودكم ونصايحكم وتجاربكم
04-01-2012, 03:31 PM
المواضيع المتشابهه
العرض العادي
