الحمد لله استلمت اللوجان ورخصت .. تقييم صغير + شكرا رينو

الحمد لله استلمت اللوجان ورخصت .. تقييم صغير + شكرا رينو

الحمد لله استلمت رينو لوجان 2010 او داتشيا لوجان سموها زى ما تسموها
الاستلام والترخيص :-
بدأت اول الرحلة فى صباح يوم الاثتنين رحت توكيل رينو فى سان ستيفانو لاقيت العربية متظبطة وكل حاجة داخل الشنطة وجاهزة على الاستلام والعربية عليها نمر تجارية من غير ما اطلب
بينى وبينكو كنت شايل هم يوم الترخيص والتعامل مع الجهات الحكومية اللى يفقع المرارة سألت فى رينو وطلبت مندوب يجى معايا الترخيص لاقيت واحد كدة محترم اسمه عمرو بردو رايح على مرور طوسون ومعاه عربية تانية لوجان رايحة ترخص فى طوسون وطلع بالعربية التانية وانا طلعت بعربيتى (سواقة متأنية جدا) واتجهت على طوسون للترخيص وصلت المرور وبدأ العفريت قصدى المندوب يشوف شغله والحمد لله الموضوع اخد شوية مجهود لكن خلصت كل حاجة والحمد لله بدون مشاكل
شكرا توكيل رينو (ادارة المبيعات) :-
انا بشكر كل من فى توكيل رينو فرع سان ستيفانو على احترام التعامل مع العميل والمحافظة على صورة التوكيل امامه ناس شيك بصراحة فى تعاملهم
كانت المعلومات اللى عندى ان النمر التجارية ب 50 جنيه والمندوب بياخد 150 جنيه
انا دفعت 50 جنيه نمر تجارية + المندوب + 7 لتر بنزين (والله كتر خيرهم) طبعا انا دفعت اكتر شوية للمندوب نظرا لمجهوده
اخص بالشكر كلا من :-
أ/ احمد بلال مندوب المبيعات الخاص بى
أ/ عمرو ابراهيم مندوب التراخيص المرورية
أ/ مصطفى جبر مدير ادارة المبيعات بفرع سان ستيفانو
أ/ جميع العمال فى التوكيل على دراية كاملة بكيفية التعامل مع العميل والحفاظ على راحته
تقييم السيارة المبدأى ودخول لوجى اختبارات الطرق المصرية :-
كنت قلقان من اداء العربية والهزة والرعشة والرقصة والوسواس اللى اتنقل لى من خلال ملاحظات بعض الاعضاء فى المنتديات المصرية وكنت بقول لنفسى يا ترى الناس بتهول ولا العربية متواضعة ولا ايه اللى بيحصل بالظبط
اثناء عودتى من الترخيص دخلت شارع طويل عند منطقة المعمورة طبعا الشارع دة كان كويس الاول لكن حصل فيه تغيرات كبيرة حيث تحول الشارع الى مستنقعات كما نراها فى برنامج عالم الحيوان
الشارع دة طمنى من ناحية قوة العافشة ومدى استحمالها للطرق الوعرة والغير ممهدة والمطبات ومدى امتصاص العفشة لصدمات الطريق وعدم نقلها للمقصورة .. الخلاصة من الشارع دة ان العربية فعلا مصممة للطرق الغير ممهدة بكل ما تحمله الكلمة من معانى وطبعا روحت البيت وانا منهك القوى مع نوم عميق مشوفتهوش من يومين ptmnlo123per172
تانى يوم واستكمال التقييم المبدأى :-
انا مش من النوع اللى بحسس على العربية وفى نفس الوقت مش بقرص على الماتور اوى يعنى كل المشى على 3 3.5 ار بى ام فا كنت عايز اعرف مدى ثبات العربية فى المنحنيات والطرق السريعة
وكنت عايز طريق سيرك زى نيد فور اسبيد فكرت فى الطريق الدولى الساحلى لاقيت انه حيبقى فاضى انا عايز اثارة
مالقتش افضل من طريق كورنيش اسكندرية بعد الساعة 12 ليلا طبعا كنت ماشى فى قمة الاحترام 60 70 ك/س والاغانى شغالة وليلة جميلة من ليالى الاسكندرية
وبداوا الشباب يسخنوا فيا بعربياتهم المعدلة (عندنا فى اسكندرية لو انت شاب سايق عربية على البحر فى وقت متاخر من الليل اذا انت نازل تروش ) طبعا محتطش فى دماغى الا بعد ما واحد معاه عربية اوبل فيكترا معدلها ومخليها شبه عربيات النيد فور سبيد اخد من امامى غرزة مقفولة غرزة موت مقدرتش امسك رجلى بحركة غير متوقعة منى وغير ارادية وحسيت ان عربيتى بتقولى (انت مستقل بى ولا ايه ) قولتلها يا لوجى انت لسة بتلينى قالتلى دوس وملكش دعوة حاضر يا سيتى
انقل الفتيس على الرابع واعصر الدوا سة للاخر وطلع العفريت اللى مكنتش اعرف انه موجود بسم الله ما شاء الله العربية تسارعها مرضى جدا جدا جدا وانا فرحان بصراحة بالاداء بالذات انه لسة فى بداية التليين وبسم الله ما شاء الله العربية ثباتها مرضى جدا جدا جدا البور التقيل اللى الناس بتقول عليه تقيل دة تحفة تحفة تحفة مدى للعربية ثبات جميل على السرعات العالية والمنحنيات
انا سعيد الحمد لله باداء وتسارع وثبات السيارة العربية بسم الله ما شاء الله ماسكة نفسها على الطريق بشكل جميل وتعطيك احساس بالقوة والامان وسرعة استجابة الدركسيون ممتعة جدا الحمد لله
اداء الفرامل :
اول ما استلمت العربية اداء الفرامل كان سيئ جدا ما كنش عاجبنى الفرامل كانت ضعيفة
تانى يوم بدأت طبعا اظبط العربية زودت العجل نيتروجين باستخدام جهاز شفط الهوا و بعد تظبيط العربية اداء الفرامل تحول 180 درجة الفرامل 10/10 ولله الحمد وبسم الله ما شاء الله الفرامل اسعفتنى فى كذا موقف صعب من الاخر العربية بتكلبش فى الارض الخلاصة الفرامل ممتازة اهم حاجة تعدى اول يوم ليك سواقة للعربية على خير بفضل الله
الفتيس والدواسات او البدالات :-
الفتيس الحمد لله جميل نقلاته سلسة جدا ومش بعيدة عن بعض انا بعتبره نصف رياضى ولكنه مش عايز عصبية ونتش غيارات عايز التعامل معاه يكون بهدوء وحتلاقى النقلة راحت لمكانها لوحدها
دواسات العربية خفيفة وجميلة
لى تعليق وملاحظة على هذا البند لاحقا .
المميزات بدرجات :-
العربية زى الفل من كل الجهات ولله الحمد
العفشة 9.5/10
اداء تسارع السيارة 8/10
الفرامل 9/10
جودة التقفيل 7/10
الفتيس 8/10
الراحة للركاب 10/10
الراحة للسائق 9.5/10
اضاءة السيارة 10/10
نيجى للملاحظات او العيوب :
طبعا احنا عارفين ان الكمال لله وحده واى شيئ يصنعة الانسان لن يكون بالكمال المطلوب حيث ان الانسان طماع بالفطرة ويريد المزيد فى اى شيء يمتلكه طيب ايه الملاحظات
عضة المارشدير :-
الحمد لله تغلبت عليها من اول يوم ببساطة شديدة متنتش الغيار يعنى تجيب الغيار على اليمين ثنيتين وتجيب الغيار بسهوله مفيش مشكلة كبيرة يعنى فى الموضوع دة
رعشة الفتيس :
لا تؤثر على اى شيء رعشة خفيفة ومش مدايقة حتى فى ايدى (كان راكب معايا واحد صحبى خبرته كويسة جدا وانا بثق فيه ثقة عمياء لان دة انا وهو كنا بنسرق عربيات ابهاتنا زمان نيههههه .. فا قولت اشوف رايه فى موضوع هزة الفتيس ) راح قايلى ( انت بتدلع ) رحت قايله شكرا
جودة التقفيل :
جودة التقفيل جيدة ومقبولة جدا لكن تحس ان فى بعض الاماكن موفرين فيها زى الحواف اللى حوالين صقاطة الباب مش عجبانى بصراحة بتلكك شوية
دهان اللوجان :
دهان اللوجان جميل وكل الوان العربية حلوة لكن لاحظت حاجة عليه انه بيلم تراب بسرعة جدا ودى حاجة انا كنت حاطتها فى الحسبان لان عندى فى الشارع عربية لوجان استعوذ بالله لما بشوفها ببقى عايز انتحر (مردومة تراب على طول) وبعرف الناس بتقول ليه على اللوجان شكلها مش حلو
امبارح فى الصباح رايح للعربية فى مهمة تظبيط من الدرجة الاولى دواسات وغسيل ومعطر واللزى منه بعد غسيل السيارة راحت لامة تراب تانى قولت لا والف لا مش عربيتى اللى تبقى متوسخة كدة
رحت لمحل معروف عندنا (قبل جنب محل مؤمن شارع خالد بن الوليد) وبشوف عربيات جامدة على طول واقفة عندو بتعمل حاجات غريبة وتغليف مط الاسود دة وحكيتله على الوضع طلعلى كذا سائل المانى بيعمل طبقة شمع على الدهان اشتريته وبدأ العمل بنفسى بعد ما البواب غسل العربية وزعت السائل على العربية كلها وبعد 15 دقيقة تشيل السائل بعد ما ينشف على العربية ويعمل التفاعل بتاعه اخدت ساعة بمساعدة صديقى تامر ربنا يباركله اللى قلتلكوا عليه قبل كدة
والنتيجة مرضية جدا الحمد لله ملمس العربية بقى ناعم جدا ومش بتلم تراب زى الاول بجد استريحت كنت مضايق من الموضوع دة واتحل
فى النهاية احب اوجه الشكر لكل من ينصح بهذه السيارة الاقتصادية التقفيل وعالية الجودة فى المضمون والاساسيات
شكر خاص :
شكرا وحوش ميجان وكليو وسينيك لما تقدموه من نقل لخبراتكم (افتخروا باللوجان مفيش شركة عالمية عرفت تحل معادلة سيارة اقتصادية +رفاهية +متعة قيادة زى رينو ) بامانة واضح جدا لمسة رينو على السيارة
شكرا وحوش اللوجان على الحيادية المتناهية بجد انتوا ناس عندكوا ضمير فوق العادى برافو عليكوا
فى النهاية احب اطمن كل من يقبل على هذه السيارة .. السيارة جميلة جدا وممتعة جدا وتستحق كل مليم بيدفع فيها
شكرا رينو شكرا داتشيا تحياتى للجميع ptmnlo123per122

الموضوع الأصلي: الحمد لله استلمت اللوجان ورخصت .. تقييم صغير + شكرا رينو || الكاتب: love forever || المصدر: عرب موتورز

www.arabmotors.mosw3a.com

كلمات البحث

موتورز، سيارات امريكية، سيارات اسيوية

المصدر: عرب موتورز arabmotors موقع السيارات العربي الاول

---

hgpl] ggi hsjglj hgg,[hk ,vowj >> jrddl wydv + a;vh vdk,

تقرير غايــــــــــــه فى الروعــــــــــــه
سلمت يــــــــــــــداكـــ على رقــــى وجمــــــــــال طرحكــ
ابــــداع متواصـــل ماشــــــــــاء الله

يسلموووووووووووووو

تقرير رائع يسلمووووووووووو